رات کو جلدی سونا اور صبح جلدی اٹھنا کیوں ضروری؟

بنجامین فرینکلین کا قول ہے:
''Early to bed and early to rise makes a man healthy, wealthy and wise".
رات کو جلدی سونا اور صبح جلدی اٹھنا انسان کو صحت مند، دولت مند اور عقلمند بناتا ہے۔ کیا حقیقت میں رات کو دیر سے سونے اور دن میں دیر سے اٹھنے سے صحت کو نقصان ہوتاہے؟ اور اس کے برعکس کیا رات کو جلدی سونے اور دن کو جلدی اٹھنے سے صحت اچھی رہتی ہے؟کیا آپ جانتے ہیں آپ کے جسم کے اندر ایک حیرت انگیز حیاتیاتی گھڑی (Biological Clock)  ٹِک ٹِک کر رہی ہے۔ یہ گھڑی بہت ٹھیک وقت بتاتی ہے۔ یہ حیاتیاتی گھڑی آپ کے بہت سے جسمانی افعال کو کنٹرول کرتی ہے۔ جس میں نیند کا وقت بھی شامل ہے۔ رات گیارہ بجے سے شب تین بجے تک آپ کا زیادہ تر خون جگر میں جمع ہوتاہے۔ خون جگر میں پہنچنے سے جگرکچھ بڑا ہو جاتاہے۔ یہ ایک اہم وقت ہوتا ہے کیوں کہ اس وقت آپ کا جسم فاسد مادوں سے نجات حاصل کر رہا ہوتا ہے۔ یہ وہی وقت ہے جب آپ کا جگر جسم میں دن بھر کے دوران جمع ہونے والے زہریلے فاسد مادوں کو توڑ کر ناکارہ بنانے میں مصروف ہوتاہے۔ لیکن آپ اس وقت نہ سوئیں تو آپ کا جگر زہریلے مادوں کو جسم سے خارج کرنے کا عمل ٹھیک طور پر انجام دینے سے قاصر رہے گا۔ جگر کو یہی کام انجام دینے کے لیے چار گھنٹے درکار ہوتے ہیں اور یہ آپ پر انحصار ہے کہ آپ جگر کو کام کرنے کے لیے کتنا وقت دیتے ہیں۔ اگر آپ 12  بجے سوئے تو جگر کو تین گھنٹے ملیں گے اگر آپ ایک بجے سوئے تو جگر کو دو گھنٹے ملیں گے اور اگر آپ دو بجے سوئے تو پھر جگر کو زہریلے مادوں کی صفائی کے لیے صرف ایک گھنٹہ ملے گا اور اگر آپ رات تین بجے کے بعد سوتے ہیں تو پھر فاسدمادوں کو جسم سے خارج کرنے کا موقع نہیں ملے گا اور اگر آپ سونے کے لیے یہی معمول برقرار رکھتیہیں تو ایسی صورت میں زہریلے مادے جسم میں جمع ہوتے رہیں گے۔ رات میں دیر سے سونے اور دیر سے سو کر اٹھنے سے آپ کے جسم کو فاسد مادوں کو خارج کرنے کا موقع نہیں ملے گا اور آپ کا جسم اور بہت سے افعال نہیں کرپائے گا۔ رات  3  بجے سے صبح  5  بجے تک دورانِ خون کا زیادہ زور پھیپھڑوں پر ہوتاہے۔ اس لیے آپ کے لیے اس وقت میں ورزش کرنا اور تازہ ہوا میں سانس لینا بہتر ہے۔ یہ وہ وقت ہوتا ہے جب ہوا ہر قسم کی آلودگی سے پاک بالکل تازہ ہوتی ہے۔ اور یہ ہوا صحت بخش ہوتی ہے۔صبح کے وقت خون بڑی آنت میں مرتکز ہو تاہے اس وقت آپ کو فضلہ خارج کرنے کے لیے بیت الخلا کارُخ کرنا چاہیے۔
 تاکہ فضلہ آپ کی بڑی آنت سے خارج ہو جائے اور آپ کا جسم دن بھر زیادہ غذائیت جذب کرنے کے لیے تیار ہو جائے۔صبح  7  سے  9  بجے تک خون کا زیادہ تر بہاؤ معدے کی سمت ہوتاہے اس وقت آپ کو ناشتہ کرنا چاہئے۔ یہ آپ کے دن کا سب سے اہم کھانا ہوتا ہے اس بات کو یقینی بنائیں کہ ناشتے میں وہ تمام چیزیں شامل ہوں جن سے آپ کے جسم کو تمام مطلوبہ غذائیں مل جائیں۔ اگر آپ ناشتے کا ناغہ کریں گے تو آپ کو مستقبل میں صحت کے کئی مسائل کا سامنا کرنا پڑے گا۔اس لیے ہمیں اپنی صحت اچھی رکھنے کے لیے جلدی سونے اور جلدی اٹھنے کی عادت بنانی چاہئے اور صبح کا ناشتہ بھرپور کرنا چاہئے۔ لیکن موجودہ دور میں ہم اس کے برخلاف کرتے ہیں دیر سے سونا، دیر سے اٹھنا اور صبح کا ناشتہ بھرپور کرنے کی بجائے رات کا کھانا بھرپور کرتے ہیں جس کی وجہ سے صحت پر بہت مضر اثرات مرتب ہوتے ہیں۔اپنی صحت کو ٹھیک رکھنے کا صرف ایک ہی چھوٹا سا اور سادہ سا فارمولہ اپنا لیں کہ اپنے سونے اور اْٹھنے کا ٹائم ٹیبل بنا لیں اور متوازن خوراک کھائیں۔کیونکہ اچھی صحت کامیاب زندگی کی علامت ہے۔